Բարև Ձեզ: Ես Արտյոմն եմ: Մարդ, որն իր կյանքի մեծ մասը նվիրել է ճանապարհորդություններին, արշավներին և բացահայտումներին: Ավարտել եմ Հայ-ռուսական (Սլավոնական) համալսարանը 2011 թվին։ ArmLand-ի հիմնադիր տնօրենն եմ: 2014-ից ակումբն իր բուռն գործունեությունն է ծավալում լեռնագնացության ոլորտում ինչպես Հայաստանում, այնպես էլ երկրի սահմաններից դուրս։ Ակումբի ղեկավար լինելուց բացի, նաև ակումբի լեռնային գիդ-ուղեկցորդն եմ: Ունեմ 5000+ գրանցած վերելքներ, ինչպիսիք են՝ Արարատը, Էլբրուսը և Կազբեկը: Այս կայքը ներկայացնում է այն ամենը, ինչ կազմում է իմ առօրյան, կյանքը: Ես վստահ եմ, որ յուրաքանչյուր մարդ պետք է փնտրի նոր արկածներ, դուրս գա իր սովորական և առօրյա միջավայրից, կոտրի կաղապարները, որոնցում հայտնվել է ակամա, և բացահայտի իրական ինքնությունը: Ես դա արել եմ և անում եմ ճանապարհորդելով: Միացե՛ք մեր թիմին, և եկե՛ք բացահայտենք աշխարհը միասին:
Ողջո՜ւյն։ Ես Գոհարն եմ՝ ակումբի ավագ տուր-մենեջերը և լեռնային գիդը։ Ավարտել եմ Վ․ Բրյուսովի անվան ԵՊԼՀ համալսարանի Տուրիզմի բաժինը։ Լեռնագնացությունը՝ որպես արվեստ բացահայտեցի 2021թ․-ին։ Երբ բարձրացա առաջին լեռս, հասկացա՝ սա իմ ապրելակերպն է դառնալու։ Մարդիկ լեռներ են բարձրանում ամենատարբեր պատճառներով. Գեղեցիկ տեսարաններ, ադրենալին, բնություն, լուսանկարչություն, դե, իսկ ինձ նման մարդիկ էլ պարզապես լեռներում լինելու պատճառ են փնտրում։
Պաշտում եմ լեռներն ու իմ աշխատանքը․․․
Ողջու՜յն։ Ես Սիրանն եմ՝ ակումբի լեռնային գիդը և բովանդակության հեղինակը (content writer)։ Ավարտել եմ Հայ-ռուսական (Սլավոնական) համալսարանի Տուրիզմի բաժինը։ Զբաղվում եմ վազքով, սիրում եմ լեռները և բնությունը։ Լեռնային ակտիվությանը զուգահեռ նաև հոգատար մայրիկ եմ:
Ողջու՜յն, ես Մագան եմ՝ մեր ակումբի սոցիալական մեդիայի մենեջերը: Սովորել եմ Լեզվաբանական համալսարանի զբոսաշրջության բաժնում։ Մի չքնաղ աղջկա մայրիկ եմ։ Սիրում եմ ֆիլմարտադրությունը և այժմ սովորում եմ սցենար գրել։
Ողջույն, ես Էլինան եմ, մասնագիտություններս մի քանիսն են և բոլորն էլ կապված գեղեցիկի հետ՝ հագուստի մոդելավորող, լուսանկարիչ, գրաֆիկ դիզայներ և արշավական ակումբի տուր մենեջեր։ 2019 թվականից զբաղվում եմ լեռնագնացությամբ։ Լեռնագնացությունն օգնում է պարզել ֆիզիկական և էմոցիոնալ սահմանդ, որի արդյունքում կոփվում ես ու դառնում ավելի ուժեղ, անկոտրում։ Լեռներից ստացված էներգիան ներդնում եմ արվեստիս մեջ։։
Բարեւ Ձեզ։ Ես Հովհաննեսն եմ, լեռների մեծ սիրահար: Արմլենդ թիմի լեռնային գիդերից եմ։ Բարձր լեռներն իմ մոտիվացիան են 2019թ.-ից։ Բացի սարերից, սիրում եմ նաև թռչել պարապլանով և պարանով ցատկել։
Իմ աշխատանքի շնորհիվ ես կարողանում եմ անել այն, ինչ սիրում եմ, ինչպես նաև գումար վաստակել դրա համար, չէ՞ որ դա ֆանտաստիկ է:
Ողջու՜յն։ Ես Տիգրանն եմ, Արմլենդ թիմի լեռնային և դահուկային գիդը: Երեք հրաշքների հպարտ հայր եմ։ Բարձրացել եմ 5000մ+ լեռներ, ինչպիսիք են՝ Արարատը, Կազբեկը (10x), Էլբրուս, Դեմավենդ և մի քանի տեխնիկական 4000մ+ լեռներ։ Այժմ Հայաստանում զարգացնում եմ Skimo Alpinism (դահուկային լեռնագնացությունը) որպես սպորտ:
Ուրախ կլինեմ հանդիպել ձեզ լեռներում:
