Թերմոսի կառուցվածքը
Թերմոսը ցուրտ եղանակին թույլ չի տա, որ տաքացնող ըմպելիքը սառչի, իսկ շոգին՝ ջուրը տաքանա։ Ջերմաստիճանի ռեժիմի պահպանումը և օգտագործման հեշտությունը մասամբ ձեռք են բերվում թերմոսի նախագծման առանձնահատկությունների շնորհիվ՝
- Ներքին կոլբա
- Պաշտպանիչ պատյան
- Անօդ շերտ կոլբայի և պատյանի միջև (ավելի հաճախ՝ լրացուցիչ ջերմամեկուսիչ նյութ)
- Խցան և կափարիչ
- Լրացուցիչ ֆունկցիոնալ տարրեր
Վակուումի շնորհիվ ջերմությունը դուրս չի գալիս կոլբայից այն կողմ: Լրացուցիչ ջերմամեկուսիչ հատկություններ կարող են ապահովվել ներքին պատի հայելային ծածկույթով: Պատյանը պաշտպանում է կոլբան և պարունակությունը մեխանիկական վնասվածքներից:
Լրացուցիչ տարրերը ներառում են բռնակ, որը թույլ է տալիս հարմարավետորեն պահել և թեքել թերմոսը ըմպելիք լցնելիս, կոճակով կափարիչ, որը թույլ է տալիս բացել թերմոսը մեկ ձեռքով և խմել շարժվելիս: Կափարիչը նույնպես բավականին հաճախ օգտագործվում է որպես բաժակ կամ ափսե, կախված տրամագծից:
Թերմոսի պատրաստման նյութը
Պլաստիկ. Օգտագործվում է արտաքին պատյանի և/կամ խցանի համար: Այն երկար չի պահում ջերմությունը, սակայն դրանից պատրաստված թերմոսները շատ թեթև են։ Պտուտակային տիպի պլաստիկ խցանները ապահովում են լավագույն ամրությունը: Երբեմն պլաստիկ խցանների համար օգտագործվում են ռետինե օղակներ:
Ապակի. Օգտագործվում է ներքին կոլբայի համար։ Չի ներծծում հոտերը, ունի ցածր ջերմահաղորդություն։ Այնուամենայնիվ, ապակե կոլբայով թերմոսները չափազանց փխրուն են և հարվածադիմացկուն չեն։ Դրանց հարմածադիմացկունությունը կարող են բարձրացնել կոշտ ջերմամեկուսիչ նյութերը, բայց դրանց օգտագործումը բարձրացնում է թերմոսի քաշը:
Չժանգոտվող պողպատ. Այս թերմոսները ավելի ամուր են և հարածադիմացկուն: Լավ պողպատը կոռոզիայից զերծ է, բայց կարող է կլանել հոտերը:
Թերմոսների տեսակները
Պայմանականորեն թերմոսները կարելի է բաժանել երեք տեսակի.
- թերմոսներ հեղուկների համար
- թերմոսներ սննդի համար
- թերմոբաժակներ
Առաջին և ամենատարածված տեսակը հեղուկների համար նախատեսված թերմոսն է: Այն ունի էրգոնոմիկ երկարավուն ձև, որը հեշտացնում է արշավային ուսապարկի մեջ տեղավորելը, ունի բավականին նեղ գլխի հատված և փոքր խցան: Թերմոսի այս դիզայնը նվազագույնի է հասցնում ջերմության կորուստը և թույլ է տալիս հեղուկները տաք պահել առավելագույն երկար ժամանակով: Բացի այդ, հեղուկների համար նախատեսված թերմոսների մեծ մասի վրա վերին պտուտակավոր կափարիչը ծառայում է որպես բաժակ, ինչը թույլ է տալիս խուսափել ձեզ հետ լրացուցիչ պարագաներ վերցնելուց: Որոշ մոդելներ ունեն կափարիչ լրացուցիչ ներդիրով, որը ծառայում է որպես երկրորդ բաժակ:
Երկրորդ տեսակը սննդի համար նախատեսված թերմոսն է։ Այն ունի լայն գլխի հատված, որը հարմար և հեշտ է դարձնում սնունդը տեղադրելն ու հանելը: Լայն գլուխը թույլ է տալիս ուտել անմիջապես թերմոսից, բայց ունի զգալի թերություն՝ դրա միջոցով ջերմության մեծ կորուստ է տեղի ունենում, ուստի նման թերմոսի պարունակությունն ավելի արագ է սառչում։ Սննդի թերմոսը հարմար է ինչպես հեղուկ սնունդ, այնպես էլ պինդ սնունդ տեղափոխելու համար։ Միևնույն ժամանակ, հեղուկ սնունդը, ինչպիսին է ապուրը, ավելի երկար է պահպանում իր ջերմաստիճանը, քան պինդ սնունդը, քանի որ այն զբաղեցնում է թերմոսի ամբողջ ծավալը՝ առանց օդային խոռոչներ ձևավորելու։
Թերմոսների երրորդ տեսակը թերմոբաժակներն են։ Իրենց կոմպակտ չափսերի շնորհիվ դրանք հեշտությամբ տեղավորվում են փոքրիկ պայուսակի կամ ուսապարկի մեջ։ Թերմոբաժակը ունի հատուկ խցան, որը հեշտությամբ բացվում և փակվում է մեկ ձեռքով, ինչը թույլ է տալիս օգտագործել այս թերմոսը շարժման մեջ:
Թերմոսի ծավալը
Թերմոս ընտրելիս պետք է հիշել հիմնական օրինաչափությունը.որքան մեծ է դրա ծավալը, այնքան երկար է թերմոսը պահպանում ջերմությունը: Բայց որքան մեծ է ծավալը, այնքան ավելի ծանր է և ավելի մեծ: Թերմոսի ծավալը պետք է ընտրվի ՝ հաշվի առնելով ամենօրյա երթուղու տևողությունը և այն մարդկանց թիվը, որոնց համար նախատեսված է: Մեկ անձի համար 0,5 – 1 լ ծավալով թերմոսը (կախված երթուղու տևողությունից ) սովորաբար բավարար է: Երկուսի համար, համապատասխանաբար, ավելի լավ է ընտրել մեկից երկու լիտր ծավալով թերմոս ։ Կան ավելի քան երկու լիտր ծավալով թերմոսներ, որոնք նախատեսված են մեծ քանակի մարդկանց համար, բայց իրենց չափսերի և քաշի պատճառով դրանք վատ կիրառելի են ակտիվ ժամանցի համար ։ Նման թերմոսները շատ տեղ են զբաղեցնում, և անհարմար է դրանք ձեզ հետ վերցնել արշավի ժամանակ։ Քայլարշավի ընթացքում մեծ թվով մարդկանց տաք թեյ խմելու համար ավելի լավ է վերցնել միջին ծավալի մի քանի թերմոսներ:
Տաքությունը պահելու ժամանակը
Թերմոսների համեմատության հիմնական չափանիշը հեղուկի ջերմաստիճանը պահպանելու ժամանակն է ։ Այս ցուցանիշը սովորաբար նշվում է թերմոսի փաթեթավորման տուփի վրա և արտացոլում է դրա ջերմամեկուսացման բնութագրերը: Որքան մեծ է թերմոսի ծավալը, այնքան երկար է այն պահպանում ջերմությունը: Հետևաբար, ճիշտ է համեմատել միայն նույն ծավալի թերմոսները: Ջերմամեկուսացման բնութագրերը նույնպես մեծապես կախված են թերմոսի գլխի հատվածի լայնությունից և խցանի դիզայնից: Որքան փոքր է գլխի հատվածի տրամագիծը, այնքան քիչ է ջերմության կորուստը, և այնքան երկար է ձեր ըմպելիքը մնում տաք: Ընդհանուր առմամբ, հեղուկների համար նախատեսված կես լիտրանոց թերմոսների համար ջերմամեկուսացման լավ ցուցանիշ է տաք ըմպելիքների ջերմաստիճանի պահպանման 12 ժամը, լիտրի համար ՝ 24 ժամը։
Խցանների տեսակները
Խցանների երկու հիմնական տեսակ կա.
— պարզ պտուտակային խցան
— կոճակով խցան:
Առաջին տեսակն առանձնանում է դիզայնի պարզությամբ և հուսալիությամբ: Թերմոսից ըմպելիքը կարող եք լցնել կամ ամբողջովին բացելով խցանը, կամ, եթե խցանն ունի կողքերին հատուկ ակոսներ, բավական է մեկ պտույտ անել, որպեսզի հեղուկը ակոսներից լցվի ձեր բաժակը։ Կոճակներով խցաններն ավելի բարդ դիզայն ունեն, սակայն թույլ են տալիս հեշտությամբ և արագ, մի ձեռքով բացել և փակել թերմոսը, այդպիսով ապահովելով օգտագործման հեշտությունը և նվազեցնելով ջերմության կորուստը: Կոճակով խցանների հիմնական թերությունն այն է, որ դրանք ավելի դժվար են լվացվում, համեմատած սովորական պտուտակային խցանների հետ: Բացի այդ, իրենց ավելի բարդ դիզայնի պատճառով նման խցանները կարող են ժամանակի ընթացքում փչանալ:
